ஊவா மாகாணத்தில் பல்வேறு விதமான பெயர்களில் காணப்பட்ட 203 தமிழ் மொழி பாடசாலைகளில் முதற்கட்டமாக 140 தமிழ் மொழி பாடசாலைகளின் பெயர்கள் தமிழ் மொழிக்கு மாற்றப்பட்டுள்ளன.
தமிழ் மொழி பாடசாலைகளுக்கு தமிழ் மொழியில் பெயர் வைக்கப்பட வேண்டும் என்ற எண்ணத்துடன் ஊவா மாகாண சபைக்குட்பட்ட பகுதிகளிலுள்ள தமிழ் பாடசாலைகளின் பெயர்களை மாற்றும் நடவடிக்கைக்கு கடந்த காலங்களில் சில தரப்பினர் எதிர்ப்பை வெளியிட்டு வந்திருந்த நிலையில் தான் இந்த நடவடிக்கையை முன்னெடுத்ததாக ஊவா மாகாண முன்னாள் தமிழ் கல்வி அமைச்சர் செந்தில் தொண்டமான் தெரிவித்துள்ளார்.
இந்த நிலையில், ஊவா மாகாண சபை கடந்த 8 ஆம் திகதி கலைக்கப்பட்ட நிலையில், அன்றைய தினத்திலேயே தமிழ் பாடசாலைகளின் பெயர்களை மாற்றும் வர்த்தமானி அறிவித்தலில் மாகாண முன்னாள் கல்வி அமைச்சர் செந்தில் தொண்டமான் கையெழுத்திட்டிருந்தார்.
மாகாண சபை கலைக்கப்படும் தருணத்தில் இந்த வர்த்தமானி அறிவித்தல் கையெழுத்திட்டமை சில தரப்பினரால் சர்ச்சையை ஏற்படுத்தியுள்ளது.
ஊவா மாகாணத்தில் வேற்று மொழிகள் மற்றும் இலக்கங்களில் அடையாளப்படுத்தப்பட்ட தமிழ் பாடசாலைகளின் பெயர்கள், தமிழ் மொழியில் மாற்றப்பட்டமைக்கு சர்வதேச அளவில் வாழ்த்துக்கள் வந்த வண்ணம் உள்ளன.
ஊவா மாகாணத்தில் ஏனைய மொழிகள் மற்றும் இலக்கங்களில் காணப்பட்ட பெயர்களை தமிழ் மொழியில் மாற்றியதை போன்று, இலங்கையிலுள்ள ஏனைய மாகாணங்களிலும் இந்த நடவடிக்கையை முன்னெடுப்பதற்கான திட்டம் நடைமுறைப்படுத்தப்பட்டுள்ளதாக ஊவா மாகாண முன்னாள் தமிழ் கல்வி அமைச்சர் செந்தில் தொண்டமான் தெரிவித்துள்ளார்.
