திருமணம் செய்துகொண்டதாக வெளியான செய்திகளை தொலைக்காட்சி நட்சத்திரங்கள் அஸ்வின், சிவாங்கி ஆகிய இருவரும் மறுத்துள்ளார்கள்.
கேரளத்தைப் பூர்வீகமாகக் கொண்டவர் சிவாங்கி. சந்திரமுகி படத்தில் ரா ரா பாடலைப் பாடிய பின்னி கிருஷ்ணகுமாரின் மகள். சூப்பர் சிங்கர் நிகழ்ச்சியில் பங்கேற்ற சிவாங்கி, குக் வித் கோமாளி நிகழ்ச்சியில் கலந்துகொண்டார். இந்நிகழ்ச்சி மூலமாக அவருக்கு ஏராளமான ரசிகர்கள் கிடைத்தார்கள். டான், ஆர்டிகிள் 15 தமிழ் ரீமேக் படங்களில் நடித்து வருகிறார்.
குக் வித் கோமாளி நிகழ்ச்சியில் கலந்துகொண்ட அஸ்வின், தற்போது திரைப்படங்களில் நடித்து வருகிறார். சமூகவலைத்தளங்களில் சிவாங்கி, அஸ்வின் ஆகிய இருவருக்கும் ஏராளமான பக்கங்கள் உண்டு.
இந்நிலையில் அஸ்வினும் சிவாங்கியும் திருமணம் செய்துகொண்டதாக யூடியூப் சேனலில் செய்தி ஒன்று வெளியானது. இதையடுத்து இத்தகவலை இருவரும் மறுத்துள்ளார்கள்.
மார்பிங் செய்யப்பட்ட விடியோக்கள் இணையத்தில் வலம் வருகின்றன. நான் எந்தவொரு சக நடிகையையும் காதலிக்கவில்லை. நான் சிங்கிளாகவே உள்ளேன். படங்களில் நடிப்பதில் மட்டுமே கவனம் செலுத்தி வருகிறேன் என்று அஸ்வின் கூறியுள்ளார்.
என்னையும் சக நடிகரையும் இணைத்து மார்ப் செய்யப்பட்ட படங்கள் உண்மைக்குப் புறம்பானவை. அதுபோன்ற தவறான தகவல்களை யாரும் பகிர வேண்டாம் என்று சிவாங்கி கூறியுள்ளார்.