லாக்கப், கபெ.ரணசிங்கம், மதில், ஒருபக்க கதை, மலேஷியா டு அம்னீஷியா, டிக்கிலோனா வெற்றி படங்களை தொடர்ந்து தற்போது புதிய படம் ஒன்றை வெளியிட திட்டமிட்டுள்ளது ஜீ5 ஓடிடி தளம். அந்த வகையில் சமுத்திரக்கனியின் “விநோதய சித்தம்” படம் ஜீ5 ஓடிடி தளத்தில் வெளியாக உள்ளது.
“விநோதய சித்தம்” என பெயரிடப்பட்டுள்ள இப்படத்தில் முன்னணி இயக்குனரும் நடிகருமான சமுத்திரகனி இயக்கி முதன்மை கதாபாத்திரத்தில் நடித்துள்ளார். பிரபல நடிகர் தம்பி இராமையா முக்கிய கதாபாத்திரத்தில் நடித்துள்ளார். அபிராமி ராமநாதன் இப்படத்தை தயாரித்துள்ளார். மேலும் இந்தப்படத்தில் முனிஸ்காந்த், சஞ்சிதா ஷெட்டி, ஜெயபிரகாஷ் உள்ளிட்டோர் நடித்துள்ளனர்.
இந்தப்படம் குறித்து சமுத்திரகனி கூறுகையில், ‘மனித மனம் வேடிக்கையானமுறையில் நடந்து கொள்கிறது. நம்மால் அவற்றை கட்டுப்படுத்த முடியாது. இதுதான் இப்படத்தின் அடிப்படை கரு. அனைவராலும் இப்படத்தின்கதையை உணர்ந்துகொள்ளமுடியும். இந்த கதை பார்வையாளர்களுடன் உரையாடும். இந்த படத்தை பார்வையாளர்களுக்கு காண்பிப்பதில் எனக்கு மிகவும் மகிழ்ச்சி.’ என்று தெரிவித்தார்.
படத்தின் நாயகி சஞ்சிதா ஷெட்டி கூறும் போது, ‘அனைத்து பெற்றோர்களும் குழந்தைகளும் இந்த படத்தை முழுமையாக விரும்புவார்கள். இது ஒரு குடும்பபொழுதுபோக்காக இருக்கும். இந்தப்படத்தில் நடித்ததை நினைத்து நான் மிகவும் மகிழ்ச்சியடைகிறேன்’ என்று தெரிவித்துள்ளார்.
மேலும் படத்தின் தயாரிப்பாளர் அபிராமி ராமநாதன் பேசும் போது, ‘தன்னால் மட்டுமே தனது குடும்பத்தை கவனித்துக்கொள்ள முடியும், தான் இல்லையென்றால் தனது குடும்பத்தின் நிலை மிகவும் கவலைக்கிடமாகிவிடும் என்று நினைக்கும் ஒவ்வொரு நபருக்கும் தகுந்தபதிலை கூறும் படமே ‘விநோதய சித்தம்’ என்றார். இந்தப்படம் ஜீ5 தளத்தில் அக்டோபர் 13 அன்று வெளியாகவுள்ளது.
