நடிகரும், தேசிய முற்போக்கு திராவிடர் கழகத்தின் தலைவருமான கேப்டன் விஜயகாந்த் இன்று தனது 69 ஆவது பிறந்த நாளை கொண்டாடுகிறார்.
தமிழ் சினிமா துறையிலும், அரசியல் களத்திலும் போராடி வென்றவர் கேப்டன் விஜயகாந்த். இவர் இன்று தனது 69வது பிறந்த நாளை கொண்டாடுகிறார். இதனை தொடர்ந்து திரையுலக பிரபலங்களும், அரசியல் கட்சி தலைவர்களும், ரசிகர்களும் சமூக வலைத்தளம் வாயிலாக அவருக்கு பிறந்தநாள் வாழ்த்து தெரிவித்து வருகின்றனர்.
சினிமா ஆசையால் கோடம்பாக்கம் நோக்கி படையெடுத்து வரும் கோடிக்கணக்கான இளைஞர்களில் ஒருவராக மதுரையில் இருந்து சென்னை வந்தடைந்தார் விஜயகாந்த். சினிமாவில் நிறம் முக்கியமாக கருதப்பட்ட காலக்கட்டத்தில் தன்னுடைய நிறத்திற்காகவே பல கேலிகளையும், கிண்டல்களையும் சந்தித்தார். அந்த கிண்டல்களை சவால்களாக ஏற்று, தன்னுடைய உழைப்பை மூலதனமாக கொண்டு பின்னாட்களில் நூற்றுக்கணக்கான ரசிகர்களின் மனங்களை வென்றெடுத்தார் விஜயகாந்த்.
அன்றைய காலக்கட்டத்தில் முன்னணி நடிகர்களாக திகழ்ந்த ரஜினிகாந்த், கமல்ஹாசனின் 100 வது படங்கள் தோல்வியடைந்த நிலையில் விஜயகாந்தின் 100வது படமான கேப்டன் பிரபாகரன் ஹிட்ட்டித்தது. திரைப்பட கல்லூரி மாணவர்களுக்கு வாய்ப்பளித்தது, பல புதிய இயக்குனர்களை சினிமாவில் அறிமுகப்படுத்தியது என விஜயகாந்த் மற்றவர்களுக்கு உதவியது ஏராளம். ஒரே ஆண்டில் அதிகப்படியான படங்களில் நடித்தது, காவல்துறை அதிகாரி கதாபாத்திரத்தில் அதிகமாக நடித்தது உள்ளிட்ட சாதனைகளுக்கும் சொந்தக்காரர் விஜயகாந்த்.
நடிகராக மட்டுமின்றி நடிகர் சங்கத் தலைவராக பொறுப்பில் இருந்தபோதும் அந்த துறை வளர்ச்சிக்காக பல்வேறு பணிகளை மேற்கொண்டுள்ளார். பல நடிகர், நடிகைகள் இன்றும் விஜயகாந்த் நடிகர் சங்க பொறுப்பில் இருந்து ஆற்றிய பணிகளை நினைவு கூர்ந்து மெய் சிலிர்ப்பார்கள். 2005 ஆம் ஆண்டு தேசிய முற்போக்கு திராவிடர் கழகம் என்ற கட்சியைத் தொடங்கினார். 2006ல் நடந்த சட்டமன்ற தேர்தலில் விருத்தாச்சலம் தொகுதியில் வெற்றி பெற்றார். மற்ற வேட்பாளர்கள் அனைவரும் தோல்வி அடைந்தனர். 2011ல் ரிஷிவந்தியம் தொகுதியில் போட்டியிட்டு வெற்றி பெற்றார். 2016ல் மக்கள் நலக்கூட்டணியில் இணைந்து முதல்வர் வேட்பாளராக அறிவிக்கப்பட்டார். இவர் போட்டியிட்ட உளுந்தூர்பேட்டை தொகுதியில் தோல்வியை சந்தித்தார்.
இந்நிலையில் இன்றைய தினம் தனது 69வது பிறந்த நாளை கொண்டாடி வருகிறார் கேப்டன் விஜயகாந்த். அவரின் பிறந்தநாளை முன்னிட்டு தமிழ்நாட்டின் முதலமைச்சர் மு.க. ஸ்டாலின் தனது ட்விட்டர் பக்கத்தில் பகிர்ந்துள்ள வாழ்த்து குறிப்பில், தே.மு.தி.க. நிறுவனரும் தமிழ் மக்களின் அன்புக்குரிய கதாநாயகருமான நண்பர் கேப்டன் விஜயகாந்த் அவர்கள் நீண்ட நாட்கள் உடல்நலத்துடனும் மகிழ்ச்சியுடனும் வாழ அவரது பிறந்தநாளில் எனது வாழ்த்துகளைத் தெரிவித்துக் கொள்கிறேன் என பதிவிட்டுள்ளார்.
இதே போல் நடிகரும், மக்கள் நீதி மய்யத்தின் தலைவருமான கமல்ஹாசன் தனது ட்விட்டர் பக்கத்தில், எளியோருக்குப் பாதிப்பு என்றால் தன் வரம்பில் இயன்றதை அதிரடியாகவும் உடனடியாகவும் செய்து துயர்துடைக்கும் மனம் வாய்ந்த நண்பர் கேப்டன் விஜயகாந்த் அவர்களுக்கு என் மனமார்ந்த பிறந்தநாள் வாழ்த்துகள் என பதிவிட்டுள்ளார்.
