திருகோணமலையில் தமிழ் மக்கள் பூர்வீகமாக விவசாயத்தில் ஈடுபட்ட சுமார் 1000 ஏக்கர் நிலத்தில் பௌத்த பிக்குவொருவர் அட்டகாசத்தில் ஈடுபடுவது குறித்து, தமிழ் தேசிய கூட்டமைப்பின் தலைவர் இரா.சம்பந்தன் கடிதம் மூலம் ஜனாதிபதி கோட்டாபய ராஜபக்சவிடம் முறையிட்டுள்ளார்.
தமிழ் மக்களை தமது பாரம்பரிய நிலத்தில் விவசாயம் செய்ய அனுமதிக்குமாறு கடிதத்தில் கோரியுள்ளார்.
திருகோணமலை குச்சவெளி பிரதேச செயலாளர் பிரிவிற்குட்பட்ட ஆத்திக்காடு, நீராவிக்கண்டல், பள்ளப்பாவக்கை, பட்டாணிபாதி, பாவலங்கண்டல், கந்தப்பன் வயல் ஆகிய வயல் காணிகள் தொல்பொருள் சார்ந்த இடங்கள் என்பதாக கூறி, இந்தமுறை பெரும் போகச் செய்கைக்கு மேற்படி வயல்காரர்கள் இறங்கக்கூடாது, மீறி இறங்கினால் அனைவரையும் கூண்டோடு சிறையில் அடைப்பேன் என அரிசிமலையை சேர்ந்த பிக்கு கூட்டம் போட்டு, தமிழ் மக்களை மிரட்டியிருந்தார்.
இரா.சம்பந்தன் எழுதிய கடிதத்தில்,
அரிமலை விகாரையை சேர்ந்த பௌத்த பிக்கு, விவசாயிகளை அச்சுறுத்தி, தனியார் மற்றும் பிற விவசாய நிலங்களில் பயிர்ச்செய்கை மேற்கொள்வதை தடை செய்துள்ளார். விவசாய செய்கையில் ஈடுபடுவதற்கான அரசாங்க அனுமதியை விவசாயிகள் வைத்துள்ளனர்.
இந்த நிலங்கள் பல்வேறு தனி நபர்களுக்கு சொந்தமானவை. தமது சொந்த நிலங்களிலும், அரசாங்க அனுமதியுடன் பிற நிலங்களிலும் பல தசாப்தங்களாக மற்றும் தலைமுறைகளாக அவர்களால் விவசாயத்தில் ஈடுபடுகிறார்கள். போரினால் இடம்பெயர்வதற்கு முன்னர் அவர்கள் இந்த நிலங்களில் பயிர்ச்செய்கையில் ஈடுபட்டனர்.
பெரும்பாலான மக்கள் போருக்குப் பிறகு சொந்த இடங்களிற்கு திரும்பி வந்து தாம் பாரம்பரியமாக விவசாயம் செய்த நிலங்களில் விவசாயத்தில் ஈடுபடுகிறார்கள்.
திருயாயில் உள்ள நஆத்திக்காடு, நீராவிக்கண்டல், பள்ளப்பாவக்கை, பட்டாணிபாதி, பாவலங்கண்டல், கந்தப்பன் வயல் பிரதேசங்கள் தமிழ் மக்கள் பாரம்பரியமாக விவசாயத்தில் ஈடுபட்ட பகுதிகள். இந்த நிலங்கள் அனைத்தும் சுமார் 1000 ஏக்கர் பரப்பளவில் உள்ளன. அவற்றில் சுமார் 300 ஏக்கர் தனியார் நிலங்கள். 300 ஏக்கர் அரச அனுமதி பத்திரத்தை பெற்று விவசாயத்திற்கு பயன்படுத்தப்படுகிறது. மீதமுள்ள நானூறு ஏக்கர் நிலப்பரப்பு பல தசாப்தங்களாக அந்த மக்களால் விவசாயத்திற்கு பயன்படுத்தப்படுகின்றன.
ஓகஸ்ட் 20 ஆம் திகதி, அரிசிமலை புத்த கோவிலில் வசிக்கும் ஒரு துறவி காவல்துறையிடம் புகார் அளித்ததாகக் கூறப்படுகிறது. மேலும் அவரது தலையீட்டின் பேரில், விவசாய நிலத்தில் பயிர்ச்செய்கையில் ஈடுபட்ட ஒரு உழவு இயந்தி சாரதி கைது செய்யப்பட்டு விளக்கமறியலில் வைக்கப்பட்டார்.
ஓகஸ்ட் 23 அன்று, ஒரு முக்கியமான மத விழாவிற்காக பிள்ளையர் கோயிலில் ஏராளமான மக்கள் கூடியிருந்தபோது, துறவி காவல்துறையினருடன் அங்கு சென்று, விவசாயிகள் வயல்களுக்குச் செல்லக்கூடாதென எச்சரித்தார். மீறிச் சென்றால் கைது செய்வதாக அச்சுறுத்தினார்.
செப்டம்பர் 15 ஆம் திகதிக்கு முன்னர் அந்த மக்கள் பயிர்ச்செய்கையை ஆரம்பிக்க வேண்டும் என்றாலும், பிக்குவின் அச்சுறுத்தலால் விவசாயிகள் யாரும் வயலுக்குச் செல்லவில்லை.
துறவி ஜனாதிபதி செயலணியின் உறுப்பினராக இருப்பதால், அவர் உயர்மட்ட அளவில் நடவடிக்கையெடுப்பதை இரா.சம்பந்தன் சுட்டிக்காட்டினார்.
திரியாய் விவசாயிகளின் விவசாய உரிமைகளை துறவியோ அல்லது காவல்துறையோ தடுக்க முடியாது என்பதையும், அவர்கள் பல ஆண்டுகளாக செய்ததைப் போலவே தொடர்ந்து விவசாயத்தை தொடர அனுமதிக்கப்படுவதையும் உறுதி செய்ய உடனடியாக நடவடிக்கை எடுக்குமாறு அவர் ஜனாதிபதியைக் கேட்டுக்கொண்டார்.
தொல்பொருள் செயலணி தொடர்பாக ஜூன் 15 ம் திகதி ஜனாதிபதிக்கு கடிதம் எழுதியுள்ளதாகவும், ஆனால் அவரது கடிதத்திற்கு இன்னும் பதில் கிடைக்கவில்லை என்றும் சம்பந்தன் குறிப்பிட்டுள்ளார்.
