இந்திய அணி நியூசிலாந்துக்கு எதிரான மூன்றாவது டி20 போட்டியில் விளையாடவுள்ள நிலையில் அப்போட்டியில் டோனியின் முக்கிய சாதனையை கோஹ்லி தகர்க்க காத்திருப்பது ரசிகர்களின் எதிர்பார்ப்பை எகிற வைத்துள்ளது.
நியூசிலாந்துக்கு சென்றுள்ள இந்திய கிரிக்கெட் அணி 5 போட்டிகள் கொண்ட டி-20 தொடரில் பங்கேற்கிறது. இதில் ஆக்லாந்தில் நடந்த முதல் இரண்டு போட்டியிலும் இந்திய அணி அசத்தலான வெற்றியை பதிவு செய்தது.
இதன் மூலம் 5 போட்டிகள் கொண்ட தொடரில் இந்திய அணி 2-0 என முன்னிலை பெற்றது. இரு அணிகள் மோதும் மூன்றாவது டி-20 போட்டி இன்று ஹாமில்டனில் நடக்கிறது.
இப்போட்டியில் இந்திய கிரிக்கெட் அணியின் கேப்டன் விராட் கோஹ்லி இன்னும் 25 ரன்கள் அடிக்கும் பட்சத்தில் டி-20 கிரிக்கெட்டில் அதிக ரன்கள் விளாசிய கேப்டன்கள் பட்டியலில் முன்னாள் இந்திய கேப்டன் டோனியை பின்னுக்கு தள்ளி மூன்றாவது இடம் பிடிப்பார்.
கேப்டனாக டி-20 கிரிக்கெட்டில் அதிக ரன்கள் அடித்த வீரர்கள் பட்டியலில் தென் ஆப்ரிக்காவின் ஃபாப் டுபிளஸிஸ் (1273 ரன்கள்) முதலிடத்திலும், நியூசிலாந்தின் கேன் வில்லியம்சன் (1148 ரன்கள்) இரண்டாமிடத்திலும் உள்ளனர்.
